不枉山長水遠:網走馬拉松2017

發表於2017/09/28
4,270次點閱
0人收藏
加入收藏

「原來有撻咁嘅地方架?」除了那些日本達人,大多數人聽到我去「網走」都有這樣的反應。


鄂霍次克網走馬拉松,差不多八月初我先决定參加,報名時都唔知道地點(只知道在北海道)。自己一個去,唔識揸車,仲要臨時臨急訂不到起點附近嘅酒店。因此旅程算是有少少轉折,不過難得有機會就試吓。


點解揀呢隻馬?純粹因為仲有得報同夾到自己時間,加上見到官網D相好靚。


甚少聽到香港人提及的一個賽事,今年已經係第三屆,全馬限時6.5小時 (另有3公里和5公里項目)。 今年全馬1973人參加,比賽日主持人說其中有40位來自香港、30多位來自台灣。比賽前一天要報到;沒有大型expo,攞號碼布都係設於圖書館內的一個攤位,好彩大會有安排懂英語、國語的工作人員。


由網走JR站沿著網走川行約12分鐘到達Echo Centre 2000

(圖片來源:Stephanie Kwan)


全馬在早上8:45於網走刑務所開始,與JR網走站距離約2.8公里;其實成個旅程最擔心係是我可唔可以順利去到起點(詳情係另一篇文交代,密切留意),好彩大會有巴士由JR站送去起點。


起點位於網走刑務所,在網走川附近(圖片來源:Stephanie Kwan)


早上7:45安全到達會場,已經好熱鬧,有比賽的,也有打氣的人,我趁有時間就係監獄前影相留念!之後寄存行李、去洗手間(唔駛排長龍,同埋好乾淨);8點多就上線,大會已經按照預計完成時間將參賽者分成Block A-G,在不同位置上線。


(圖片來源:Stephanie Kwan)


從一片奏樂聲開始 (0-4公里)

我在E區,大約用三分鐘先到起步點;一開始已經有學生奏樂,同埋好多人打氣、觀看。頭4公里都沿著馬路跑,有商店、油站、食肄,員工也出來打氣。


上上落落的山林 (4-12公里)

開始進入山區,本來跑得好順,不久就見到條斜坡就灰咗,碎碎步頂硬上,本身仲有D咳,好在沿途每2.5KM有水,加上邊跑邊影,時間過得特別快。之後條路有上有落,有兩旁全部都係樹,不算太曬。


仙境般的能取岬 (12-16公里)

終於離開山林,也見到其他跑手迎面而來,原來係跑落去牧場同著名景點能取岬(即刻想到非誠勿擾的舒淇)。隔離係美岬牧場,一大片草地上有好多牛。呢段路有點窄,亦有沙石同跑草地,要小心一點。


(圖片來源:官網圖片)


令人又愛又恨的能取湖 (16-27公里)

要入隧道了,出乎意料的凍,雖然見到「節能」標籤,但點解隧道內咁涼咁好風?約1公里就走出隧道,之後就沿著海岸線跑。海天一色,全部都係藍!可惜逆著風,又開始有點疲累,呢段pacing差不多每公里跌了20秒。


(圖片來源:官網圖片)


元氣補給的能取漁港 27-32公里

進入公園,亦多咗D「人氣」,公園好空曠,天氣又好,成個景象好怡人。見到有好多「元氣」補給,仲有可樂!但唔敢飲住啦⋯⋯之後就去到能取漁港,一陣陣海鮮味。


當日天氣十分好,只係有少部分時陰天,入公園前一段路迎面巧遇網友,謝謝幫忙拍照

(圖片來源:Stephanie Kwan)


考意志的單車路 32-40公里

一段好考意志的單車路,條路好窄(大約兩個人身位),仲要好似沒有盡頭。兩旁只有樹,亦開始見到D人停低或者慢行,我只好收埋相機專心去跑,就當自己跑運動場1K練習。


走進向日葵花田 40公里-終點

終於見到曙光,心情亦好起來!望到不遠處的向日葵花田,仲壯觀過當年富良野的薰衣草。完賽後先知原來花田係附屬於網走監獄的農場,沒有對外開放,亦都係呢個比賽賣點。不過要留意呢段路好多沙石,亦要經過石路,跑到40K腳軟軟好容易拗柴,興奮之餘也要特別留神。大會真係好有心思,最後的幾百米兩旁全部都係向日葵,從未試過咁靚去衝線!


今次全程都只看心跳率,到衝線一刻望住個鐘,涙水不禁湧出來,PB了。工作人員立即為我掛上木製的完成牌同披上毛巾,嗰一刻好攰好想攬住佢!


(圖片來源:Stephanie Kwan)


補給充足

大會加上私人的補給站約有19個,包括當地特產,差不多每2K就有D野飲同食。我頭幾K攞咗D小食,搞到頂住個胃! 最多人期待應該係監獄和牛,離遠已經聞到燒肉味。


(圖片來源:Stephanie Kwan)


終點嘉年華

終點位於大曲湖畔公園,大會在草地上安排咗好多攤位,其中一個係攞完賽証書,同時會給參加者啤酒換領券。另外的攤位多數賣食物,例如烤肉、拉麵、雪糕、刨冰,仲有一個大型充氣城堡俾小朋友玩。

(圖片來源:Stephanie Kwan)


在場內買的紀念tee(圖片來源:Stephanie Kwan)


雖然呢個賽事較小型同偏僻,但風景真係一流。以前去旅行成日怕長途、怕偏遠,原來真係去遠D先有咁靚景。大會亦很細心,網站同重要資訊都有中文,場內有識英語的工作人員,就算我一個去都冇撞板,過程亦相當流暢,一次好幸運的獨遊+馬拉松體驗。唯一遺憾係我張記憶card壞了,過程中拍下的所有片段只能留在心中。


(圖片來源:Stephanie Kwan)


(圖片來源:官網提供路線圖)


延伸閱讀

大腳板系列 - 紐約馬拉松(比賽日篇)

TNF CBS 長白山 50K

如果你不是認真的,不要去跑Ultra