我打贏自己 - 環大帽山越野賽後記(上)

May Lee
發表於2017/01/10
5,240次點閱
0人收藏
加入收藏

(圖片來源:May Lee)

(第七十場賽事完成!一直希望唔用輔助工具,只靠雙腿真正體驗,好開心再次唔駛Pole完賽)

習慣報賽前衡量自己有無能力完成,比賽場數會唔會黐得太埋令人太勞累。就係咁,第一場100英里賽事奉獻咗畀UTMT。

賽前不斷慫恿同學仔朋友們做賽事義工,多少有 D 私心,因為知道某一個地點有人等梗你,動力會大好多。

一開賽都尚算順利,天氣比預期熱,很快全身濕透,先响畢架山引水道執到件靚靚風褸,跟住响禾秧山再執到大會膠碗一隻。不過走元荃古道時一時不慎懶著風褸就中招冷親,上石龍拱前至著真係為時已晚。

趕住去農場鮮奶嘅CP途中,有位師姐不幸拗柴,幫佢略略扎好隻腳後繼續上路,到CP時十一伉儷已在等候,但我已覺得無乜胃口同頂住頂住想嘔。

路要繼續走,趕去深井CP時已喪瞌眼瞓,終於見到我親愛的十卜們,佢哋被我個衰樣嚇親,好多嘢食但食唔落,衰賢居然重買咗寶田源蛋糕⋯⋯好彩佢帶咗件羽絨外套,全靠件外套保到命仔,發冷嘅我夾硬食咗少少嘢又繼續上路...

又著又除加上Z型行走,不停咁瞌住眼瞓重撞埋山邊,終於聽到山頭有義工大叫「到檢查站呀!加油呀!」見到跑班同學Abby同屯門愛跑,感謝畀我入咗帳幕瞌陣先至稍稍清醒番啲。道別後繼續Z型上路,心想盡快到大欖涌CP就有乾衫換,努力呀!

終於到咗大欖涌CP,換過哂全套乾爽衣物已感覺良好咗好多,望住食物仍然食唔落,好彩Bag drop道有包即沖南瓜湯,飲住頂頂先,再拎咗啲提子乾果仁又繼續走。

以為會精神番啲嘅我完全錯哂,沿斜走上麥十時先叉中路邊大坑渠,再上到麥十時離遠見到兩架極光嘅單車,車手叫我加油,眼矇矇嘅我重反問佢係邊位(原來係Elton)...一路响麥十引水道坐低瞌過幾次,最後望錶已遠超預期時間,但要完成賽事仍然係無問題,天色已光,盡快趕去大棠吧!喺無盡嘅屯門徑石屎梯級,感覺得左腳有啲唔多妥,難道係傳說中嘅ITB?

唔理喇,繼續走走走,落公庵山時,感覺更明顯,唯有彈彈吓落咗山至講....到大棠走向CP時遇見的士,內有兩個全副武裝嘅十卜,司機停低問我點去檢查站,重叫我上車帶路。「咪玩嘢啦!」我一帶你路就即被DQ喇,叫佢跟住google走,其實轉兩個彎就到。

去到鄉公所附近見到好多參賽者,未回哂魂嘅我重諗緊係咩賽事,好白癡呀!

再續.....

延伸閱讀