【蝦叔周報】過年跑步最是瀟灑

蝦叔
發表於2016/02/11
2,611次點閱
0人收藏
加入收藏

一、我跑馬,你付鈔

猴年第一篇,先祝各位跑友身壯力健,靈活如猴,PB不斷,跑出彩虹!


愛放假,怕過年,這是不少港人的寫照。


初二朝早,突然想睇戲,一開戲院app,發現訂票畫面「滿堂紅」。就算最不想看的卡通片,就算未full house,也只是賣剩頭兩行「鼻血位」。這一刻,真心覺得,跑步多好——在大家爭票爭茶位的時候,你施施然穿上跑鞋就可以消磨一個下午,瀟灑程度,無以復加。尤其新年這幾天,天氣好到一個點,唔走轉長課真係對唔住自己。


新年多了時間上網,蝦叔留意到近來大陸有個關於跑步的電視節目,叫做《達人開跑》。節目好短,五分鐘左右一集,每集訪問一位有著特別經歷的跑者。


第一集,訪問了一位叫「小蘇」的女士。這位女士有何特別?她喜愛跑步,創立了跑步旅遊網站「42旅」。更特別的是,她還喜愛「以跑步的名義看世界」,於是毅然辭去工作,在網上「籌旗」募集旅費,以達成能在2015年跑12個馬拉松的心願。最終,真的給她籌得逾16萬人民幣,夢想成真。


老實講,蝦叔睇到都唔係好信。三唔識七,上網講一講,有人真係會畀錢你去「達成夢想」?


據小蘇自述,兩位不認識的跑友,竟然不約而同豪擲一萬元支持她。問到原因,其中一位坦言:「你的夢想也代表了我們的夢想。」更多的金錢,是來自超過500位網友,或數十,或數百,零零碎碎的捐獻,就使小蘇籌措了足夠的盤纏。


結果,在2015年,小蘇每月一個的跑了以下12個馬拉松:香港、不丹、名古屋、平壤、哥本哈根、南非五大、澳洲內陸、環勃朗峰超級越野賽、柏林、芝加哥、雅典、大城。這張名單,蝦叔睇見都口水流。



小蘇2015年跑過的12場馬拉松(圖片來源:42旅網站)


可以想像到,小蘇從眾籌到完成12個馬拉松,可堪述說的經歷肯定多不勝數。所以在2016年,她準備四處演講,告訴大家過去一年的所見所聞。更重要的是傳達一個訊息:有夢就要敢追。


小蘇承諾在每站會找來10位跑者訪問,然後在旅程過後推出一套暫名為《我們為甚麼跑步》的紀錄片。對此,蝦叔自是萬分期待。如若小蘇能將12個馬拉松的見聞輯錄成書,那就更好了。


目前,在土豆網搜尋「小蘇快跑」,可以找到小蘇出戰東京、京都、婆羅洲等的馬拉松短片,也頗為有趣。有興趣者,實在不容錯過。


二、Runner's World iPhone版終於改版

記得早幾個月,Runner's World出港版時,跑友們都頗為引頸以待。出版當天,個個捕住報檔,希望先睹為快。


有人話過:「同邊個有仇,就鼓勵他搞出版!」紙媒苟延殘喘的今天,這本老牌跑步雜誌竟敢落戶讀者群斷估都唔會多的香港,堅係好大勇氣。


跑谷中,好多跑友知道出版日期,人人都買返本,一時間頗為哄動。大家固然一方面真係想睇,另一方面都想透過買雜誌,當係想畀個機會佢,希望佢唔好咁快玩完。


到現在雜誌出了兩期,內容算是豐富。但最大問題係「美國味好重」,內容以至譯筆,都滲有濃烈的美國原版+大陸翻譯痕跡。給人覺得似是轉了繁體字的《跑者世界》。所以,有時情願索性睇原版,至少兩個月才一期的港版快得多。


不過大家都知,你去Page One買原版雜誌,幾乎成舊水,貴到抽筋。退而求其次,用iPhone睇係好選擇。好多人話,雜誌或者書,係要揭揭下睇先爽。我都覺,但如果價錢貴幾倍,又要諗辦法處理愈堆愈多的雜誌。OK,我認為「爽」這回事,其實有妥協餘地。


但一直以來,用iPhone睇Runner's World,絕對係一件攞苦黎辛的事。利申,我已經係用6 plus,即係大呎吋。但Runner's World如同iPhone上的無數雜誌,極無誠意——只係將hardcopy直接轉成電子版,你睇時要逐格放大縮細,好似驗銀紙咁「裝」住睇。不過你想用三十幾銀一期,隨時出街有得睇,又唔使諗本雜誌睇完丟好定畀人好,我唯有屈服,繼續折折墮墮咁「裝」落去。



舊版iphone runner's world截圖(圖片來源:蝦叔)


直至2016年,Runner's World 50周年,如常download新一期雜誌時見到變成一二月合成一本已經覺得古怪,一打開蝦叔直頭在地鐵「嘩」左一聲,惹人側目。側目側到夠,因為蝦叔太感動,佢終於出返個適合iPhone的版面大小,從今以後裝裝下的日子終於成為過去。



新版iphone runner's world截圖(圖片來源:蝦叔)


不過蝦叔看著一、二月號合成一期,都有擔心雜誌改版後變成雙月刊,好吊癮。但執筆寫這篇時,剛巧三月號可供下載,證明月刊形式依舊。


下一步,如果大陸版甚至港版都可以出iPhone版,那就更加是華人跑者之福了。蝦叔衷心期望有此一朝。


延伸閱讀

KO環島行

消除年節疲勞 4大絕招

SUB FREE跑步團 –大坑跑年宵