（圖片來源：Kenneth Chan）
1月23日早上7時到達北潭涌，原本穿在身上的windstopper因太凍没有寄存CP5，而決定是非常正確，因為由始到終我没有過熱感覺，衣著是Skins A200 top打底（這衫非常透汗、快乾）、之後係Dum 雞jersey, North Face windstopper, 最外是North Face Waterproof Jacket.
一開始上山大塞人，慢行15分鐘，見到前面有對講野又大聲又煩的國內同胞，剛見有位就加速過佢地，惨、又好似拉到之前右腳個傷患位，有痛並肌肉很緊，好大鍋開賽只有2km，之後果98km? 而邊塞我嘗試感受腳傷情況，痛感無加劇，放輕右腳輕jog仍可以。
到落返麥徑水塘路，jog jog吓有個女仔泊埋我左邊，我同佢一直jog到東壩。途中見佢鼻水'薯薯'，遞左張紙巾比佢，到東壩前d風超大，我全身向前趴落去，而d風係可以托起我！
頭4xkm副偈都開唔著，完全跑唔順, 而太凍加windchill會令體溫流失好快，意思是好快肚餓。今次比雷利晚上餓得更快，我平均要每十五分鐘就要放野落肚，同時因為流汗關係，每二小時肌肉都會有抽蓄感需要鹽。我身上只有朋友比我的五粒鹽丸，所以我在榕樹澳問義工拎左三包味噌湯粉到需要時直接倒入口，全晚我覺得個口好臭，齋食味粉好難頂但又好有效！
頭52km，我timetable是要不遲於8個半鐘到企嶺，但偈唔著快唔到，如果強行加快，尾50km死緊，所要追唔到8個半鐘我都無再跟plan。上完雞公山我副偈終於著，我劈住落山，逢人過人、越跑越有，直到追到701同佢狂奔到企嶺CP5！
係CP一陣就上馬鞍山，左腳腳弓位好痛，我估應該係遷就右腳令左腳傷左，左試右試左腳只要唔平掌落地（如腳踭落地就最唔痛），我就改跑姿左腳用腳踭、右腳用前掌跑，真夠特別！而落斜兩腳用前掌又唔痛喎！
到馬鞍山頂感覺溫度似零度，但d風先吹死人，我每跑一步的落腳位，都唔係我想要(意思風吹移了168磅的我)。由馬鞍山打後已經愈來愈人少，而我就越跑越有，只要保持跑是可以追sub 20, 我亦重新定目標，著Turbo追sub 20。
（圖片來源：Kenneth Chan）
去到基維爾營個胃已經頂唔順食唔落野，食乜都反胃、唔食就失溫+跌watt, 我嘔左一次飯團，嘔完再迫自己再食多次（超辛苦），如果唔係sub20無望！
一直跑，只要Input食物就可output動力，最後我backpack只袋著小包裝三角朱古力，係唯一獅子亭後食到既野！到城門剛零晨12:00, 只要用少於4個鐘kill針草帽就sub 20。針山+草山最後用了1個半小時，仍有2個半小時buffer比我完成大帽山。
大帽山亂石陣已經好凍，已經零度下，加埋windchill好似負十度咁。
身唔覺凍，但腳、手、面均全部麻痺，而且手腳都僵硬，不能跑！在非常辛苦的情況下用了1小時15分上到白波！
去到大帽山另一邊車路就完全無風，我一口氣奔落山（我跑時未落雨，路只有一個結冰位，我都跣了一跣。而落山沿途有好多車上山，亦有好多途人同我打氣！）終於見到終點的燈，去到草地好感動。
（圖片來源：Kenneth Chan）
支持我完賽有種種原因，我做到了也不負自己所托。最後以19hrs41mins過終點。我有幸參加了個永不忘記的比賽！多謝各人在Facebook、whatsapp、Instagram的關心，收到你們的心意，也抱歉讓大家掛心！
（圖片來源：Kenneth Chan）
延伸閱讀
