【創意】女生必學!5個「型不甩」運動髮型

Hidy Bobo
發表於2015/06/02
8,323次點閱
0人收藏
加入收藏
   
(圖片來源:Hidy Bobo)

【”Sweat in Style” by Hidy Bobo】(facebook: Hidy Bobo | IG: hidybobo

炎夏將至,可以話係運動女生們展示魅力,盡show quali嘅大好機會,不過,若然你想係跑道上或健身室內成為眾人焦點,單靠小背心加短褲當然唔夠,清爽俐落嘅髮型,搭配色彩多變嘅髮飾才是王道!


要靚就要由頭靚到落腳,唔好剩係顧下唔顧上,好多時見到啲姊妹們着到靚一靚去參加跑步活動,睇得出花咗唔少時間心機去裝扮,但每次跑到中途,大汗淋漓之餘,頭髮開始散亂,濕答答嘅頭髮更會黏住頸部及背脊,最後變得披頭散髮,場面尷尬。唔通真係一到夏天就剪走一頭秀髮咩!


今回我就教大家5個運動時尚髮型,簡單易學,令女生運動時望落依然活力四射,明豔照人!



(圖片來源:Hidy Bobo)


(圖片來源:Hidy Bobo)


1) 耐看馬尾變奏法

步驟1:看似簡單嘅馬尾其實都可以有變化,將兩側頭髮向內捲紮成1條馬尾。

步驟2:跟住於馬尾取出一束頭髮圍住髮圈繑1圈,最後用髮夾作固定。

小提示:沾上汗水嘅頭髮會較為糾結,建議使用非金屬物髮飾,可降低對頭髮嘅傷害。


如果想馬尾望落高啲,可以嘗試綁兩個髮圈,同時避免辮子因擺動而鬆脫亂掉,持久耐看,無論點郁點跳都唔使驚啦!



(圖片來源:Hidy Bobo)



2) 少女辮子頭


紮三股辮(鬢辮)時,三束頭髮唔好同一大小,將細嘅辮子綁入粗嘅辮子裏面,帶有細節設計嘅三辮先顯得特別,頭髮愈長,愈容易造出豐富立體嘅層次。



(圖片來源:Hidy Bobo)


3) 氣質低髮髻


低髮髻唔單止俾人1種乾淨、整齊嘅感覺,同時令女生氣質感倍增。先紮1條三股辮(鬢辮),然後喺髮束中間挖個洞,將鬢辮尾部向上一反,穿過小洞塞入去,最後用髮夾固定。對於髮尾容易打結同冇耐性嘅女生嚟講,呢個髮型就最適合不過。



(圖片來源:Hidy Bobo)


4) 1分鐘打造甜美俏麗髮型


先梳好頭髮紮成1條馬尾,然後於馬尾前面(即髮圈與髮根之間)挖個洞,再將馬尾向上一反,穿過小洞塞入去,最後將尾部拉出嚟。



(圖片來源:Hidy Bobo)


5) 輕鬆上手美人髻


先梳好頭髮紮1條馬尾,然後將馬尾扭轉盤繞成1個包包形狀嘅髮髻,喺髮束中間挖個洞,將頭髮穿過去,再向內捲兩下,最後用髮夾作固定。


(圖片來源:Hidy Bobo)



當然重可以配上毛巾或吸汗物料頭帶作點綴,一方面可以固定髮型,唔使擔心劉海及細短髮黏住流緊汗嘅額頭;另一方面亦可令你喺訓練、跑步時更為集中。





(圖片來源:Hidy Bobo)



相信呢幾個簡單實用嘅清爽髮型一定難唔倒你,趁住嚴夏未到,好好把握時間,熟練以上技巧,以後就算運動時點流汗都美麗動人,擺脫尷尬場面,自信心即刻返晒嚟!


-------------------------------------------------------------------------------------------------------------------------------


資料來源:
文章經Hidy Bobo授權,並轉載自新Monday