每個人一定都會經歷過樽頸位：工作沒有晉升機會，一段感情沒有了火花，或者跑步成績停滯不前。早前我在跑步方面也苦無突破，直到近來朋友見到我近期有點進步，開始私下問我怎樣練。恕我沒有專業知識，不敢指導他人，但在這?分享一下這幾個月的經歷，也許會令大家有點啟發。
一、兩年前苦無進展
兩年前開始跑步，速度一直沒有明顯大躍進，只能說得著是耐力好咗同穩定咗。所以我一直好討厭跑interval，更怕同人鬥快，因為我永遠在最後的一個。當時，400米2分鐘內、tempo 維持6分披已經好開心。
記得今年年初，雖然天氣好涷，每日都好認真去練，速度亦比以前進咗少少，滿心希望下一個比賽有好成績。可惜事與願違，在「關西機場泉州馬」只能走4:33，十分失望。
二、受挫後的低心率練習
某一晚教練就話「不如休息一下，隨心跑，唔好求速度住」，佢唔係放棄我，只係要調整和休息一下。其實一直蝦叔叫我試試低心率練習，但我點會有耐性。但今次就趁機休息一下，慢慢跑，冇壓力之餘又可以減肥。
4月3日第一次低心率練習，只看心率不看速度，一過148就要放慢，甚至行。感覺一點都不好受，慢之外仲要跑多，唯有同自己講，當減肥啦，慢跑可以消脂嘛。
蝦叔無野多，就係書多，連跑步理論書都好多。閒來我揭下，其中唔少人原本都不約而同提倡低心率練習。另外，亦有同一啲快腳朋友私下交流，原來他們有些都是長期做大量低心率訓練，終於令我對呢件事有信心，心甘情願將呢個「龜速訓練」捱落去。
三、忍耐後的收成
如是者日復日（真係好悶）跑了兩個月低心率，開始習慣，速度也快了。由8分、7分半提升至6分半。由於自己感到已經冷靜下來，6月中就重回跑班，第一課 6 x 800 (下圖），第一圈感覺腳好輕，沒有以往好重的感覺，竟然跑出3:4x，兩年以來只有一次跑入這個時間，而之後的幾圈也能夠順利完成。
隨後的練習80%也是低心率，再配合tempo 同interval，加上教練改善跑姿，速度慢慢提升 (真的感謝教練一直沒有放棄我呢隻慢腳)。
四、reset自己，永不放棄
四個月前我從來沒有想過要做什麼成績，能夠PB已經好了。遇到樽頸位當然沮喪「點解永遠都係包尾」，蝦叔一句「咁咪想辦法解決」點醒了我。遇到樽頸便要接受自己不足，現在的能力未能去下一階段，倒不如reset自己，打好基礎再重新出發。七分、八分披也好，繼續跑一定可以有改善，「真的喜歡就別放棄」。
延伸閱讀
