其實打颱風上富士山山頂,又有咩好怕喎!

Henry Yeung
發表於2017/07/11
3,149次點閱
0人收藏
加入收藏

日期:2017年7月4日至5日


行程準備:

早在3月尾已經經日本的旅行社預約了4/7/2017 – 5/7/2017的登富士山山頂之旅。富士山山上的山屋通常會預留少量位置比日本本地的旅行社去使用。今次上山連同2個大學讀書的同學一同上山。


經旅行社報名有個好處就係佢什麼都幫你預備好哂(最緊要係旅行社係會幫你預訂埋山屋,不用等佢叫你上paypal比錢),你只要出現就可以。旅行社包左上山同回程的交通;不過,今次我選擇的行程係自己行上山,不是跟旅行社的導遊一齊上山,可以跟隨自己的節奏而行,始終識我的都知道我之前傷過小腿脛骨前面,所以無論是比賽,練習或是日常生活都會好小心處理,一感覺痛就停止所有活動。


講番旅行社個行程,愈早出發就愈比少d錢,同埋自己自行上山就會便多1000円。報團時1人就可以。


出發前:

上山/體能訓練:因為平時都有跑開步及做少少體能,都冇咩點樣做上山的訓練,及已經7個月冇行過山...這不是重點,重點係無論你操山操到幾好都好,一有高山症全都會泡湯!當然機會係會留比有準備的人。


個人上山裝備:

中筒行山鞋

行山襪(2對,方便替換)

水(4L),運動飲品(1L),

風褸X 1,羽絨 X 1,3合1防水風褸加Fleece X 1

勞工手套

頭巾 X 1

毛巾 X 2

行山手杖 X 2

太陽油

替換的衣物

濕紙巾

頭燈 X 1

垃圾袋

100円硬幣


出發當天:

7:10到新宿西口集合,經旅行社點名後就會上車出發,整團大約有25人,當中大部分係日本人,其次是香港人同台灣人。


*出發時已知日本會打颱風,但是問過旅行社果邊佢地會如常出發,有危險會另行再安排。所以到了富士山上好大機會會好大風同大雨。


中途會有一次落車的機會去洗手間同買早餐,日本長途車(2小時或以上多數會有呢個安排)。


在車上導遊會派發行程概要同解釋,因為係唔識日文的關係,全程都只是聆聽而已。最緊要係導遊派了御來光館的證明,好讓我們一陣入住之用。


大約10點半就到達富士山五合目吉田口,一落車就感到好凍,大約得18度左右,都要即刻著番風褸。跟著就周圍影下咁啦,去神社睇下,其實都冇食到午餐,大約半個鐘就開始上山。呢個時候並沒有高山症癥狀出現,預定目標係5-6小時可以上到御光來館(有一個朋友預左佢係遲1個鐘才上到,在上山途中係由佢慢慢上)。


11:00開始上山,預5點前上到御來光館。標高為2305米


開始的路段較為平坦,當然有少部分上斜路段,步行大約20分鐘便會見到「富士登山口(吉田口)」的路牌。標高為2390米


再行約30分鐘就到六合目,這裡有公衆臨時洗手間,及富士山安全指導中心。從這裡向上望可以望到「之」字型的登山路。


到12:30已上到七合目的花小屋,之後開始就是不斷的「之」字型的登山路,而每一步都會開始舉步為艱,呢個時候我也與另一個較慢的了朋友分道揚鑣喇!係呢個時候,雖然天氣一直都是天陰陰,但現場的紫外線係好高的,所以要時刻都要茶上太陽油!


一路上都有1對夫婦同其兒子登山,但佢地係冇裝備的,所以一路行一路傾都叫佢地唔得就下山。因為天黑了的下山路係好難落同危險,加上又有颱風過緊來,佢地最後係八合見都回頭下山喇,總算放心了!


而在13:30都到了八合目,身體開始攰喇,同埋自己的心跳也開始跳得快同強,係呢個時候就要大休喇!


直至15:15,到了標高為3250米高的元祖室,我自己的心跳也開始跳得快同強都繼續持續,上山速度要再慢一點,才能舒服一d,呢個時候,室外溫度係得番10度。加上抬頭望上天,天氣開始變得極度惡劣,強風迎面吹來使人連前進也困難。呢個時候我同另一個朋友就知道快要下狗屎喇!


收拾心情後,便繼續上山。從八合目開始,會有幾條通往下山道的連接道路,想放棄的話可加以利用。登上八合目後,開始感覺到空氣變得稀薄,記得用力呼吸,及多加休息。


*而係剛開山的時候,山頂上的下山道係未能開放,全部都要落酊近八合目再轉幾條通往下山道的連接道路。


到16:00到了本八合目,標高為3350米,此時的能見度只係得番幾米,現場都好大霧。


到16:30,只欠一個之字路就到御來光館就開始落狗屎喇!


入到御來光館,館主及其他同事們會給比膠袋裝鞋,我需要帶同我的鞋入就寢區,掛在頭頂。 (這反而可能有好處,不怕第二天別人拿錯。)


就寢區只是一間大通鋪,床鋪分上下格,上格的空間似乎會多小小,下格的高度大概一米二、三左右吧。大概兩米闊度的空間居然要睡四個人,躺下後要轉身都有點困難。床尾有一點空間放行李,高個子的人便會有點狹窄。頭頂有些掛鉤可以掛衣物、鞋等等。今次上到御來光館還早,現場只有幾個登山客,當中有幾個都係香港人,而我們被安排住在上格,這是真好啊!可以企係度整理行李同活動。


今天花了大約5個半小時,由高度2305m走到3450m,爬了約1150m,明天還要爬多300m才到山頂,速度還算是okay吧。


晚餐就食左個漢堡飯加個沙律,有一杯熱茶提供。另外會比埋另一日早上的早餐(有包綠茶)比你KEEP住。


在上格頭3個鐘頭係真是訓左嫁,最衰係高山症發作,個頭痛到就快爆炸咁樣,都開始打定輸數聽日(5/7/2017)一定不能登頂,有2個鐘不能訓覺,同埋係床聽到出面橫風橫雨,果時係冇人敢郁,只是聽到好多香港人人訓唔著係度傾心事同家事分享,輾轉間又比我訓番直至2點鬧鐘響了,大廳已有十多人企係度準備愜口館主公佈能否上山,這時我回床又訓番15分鐘,再起身發覺自己冇哂頭痛。hah!


係2:30食個早餐就準備3:15出發攻頂。今次我叫2個朋友不用上山,因為一個裝備唔夠同埋另一個有高山症癥狀喇,反而同了另一個剛結識的香港朋友上山。


3:15準時出發(出面氣溫得2度),一出發就發生蝦碌(不是蝦叔)事件,全部人都行錯左方向,要180度回頭!出發時出面係刮起大風同有大雨,能見度都係得幾米,但總算可以起利先。


到了4:00在山上開始見到有日出的曙光,莫非今天可以睇到御來光?


此時山上還有積雪,現場都好大風嫁有。


到4:25日出終於出現了,又係果句"其實落雨又咩好怕喎,希望在明天丫嗎"!


全場都歡呼起來!現場雖然係零度以下,但氣氛卻勝於一切!


在山上郵局係未開,劍峰都係未開,下山道就梗係都未開,影左一輪相就開始下山了,用了3:30就落到五合見喇!

(圖片來源:Henry Yeung)


感謝你,富士山!


延伸閱讀

390公里的旅程 - 女旅女跑環沖繩

大阪跑鞋朝聖行 - ASICS Running Store

跑馬送關懷,為地震後的熊本加油