講真，無啦啦唔會返大陸，除左馬拉松。武漢，一個從來冇想過去嘅地方，大概出發前一星期先知位於中國地圖上邊度、名勝有黃鶴樓、武漢大學嘅櫻花、食辣的等。因為武漢馬拉松，蝦嫂又再次北上冒險，以腳步探索呢個陌生嘅城市。
今次選擇由深圳搭高鐵，下午到達就去拿選手包。Expo位於博覽館，十分大型，有好多攤位同紀念品，可能已經最後一天，人不算多，過程十分順利。
（圖片來源：Stephanie Kwan）
比賽當日一大早就由酒店出發，搭一個站地鐵去起步點。雖然天氣不似預期，陰陰天加上好大風，應該只有10度，無損參加者同旁觀者高漲嘅心情。反而有少少厭戰嘅我不太興奮，加上擔心自己表現。等到差不多7:30，一如既往嘅大陸，比賽開始在嘈吵中開始了。
（圖片來源：Stephanie Kwan）
站在B區嘅我地，只用左約一分鐘多就踩線起跑。前兩天已經收到sms說頭段賽道較窄，有心理準備，不過實際上又不太迫。頭段由江漢路開始，沿途經過步行街，好多英式建築物，感覺置身博物館。走過5.20K（普通話＂我愛你＂）影相位，雨開始下，但亦無減圍觀者熱情，男女老友不斷影相同吶喊助威。沒有太多廣告banner、也不太多清一色嘅打氣隊，感覺上唔似大會安排嘅媒。
雨越下越大，走了8K整對鞋已經濕透，腳重重的上長江大橋，第一次用腳橫渡長江，心情突然振奮，加上今年是建橋60周年，別具意義。之後又見到著名景點黃鶴樓，已經覺得今次冇揀錯比賽，短短10多K已經好精彩。
（圖片來源：Stephanie Kwan）
之後經過13.14牌 （一生一世），一直跑過沿江大道，再上大橋到湖北圖書館，差不多20K了，與半馬跑者分流，路變得更闊，起初感覺孤身上路，連歡呼聲也好似少咗。
原來是錯覺，由22K開始進入東湖，一直至到38K都係圍住嗰湖跑。雖然天色麻麻，但風景仲好靚，忍不住停下來影相留念，「一期一會」，真係唔知下次幾時會再來。而且氣氛十分熱鬧，也有好多打氣、High Five、同各種補給，例如紅豆包、蕃茄、壽司。美中不足嘅係風好大，大部分時間也逆著風走，比平時走較吃力。
（圖片來源：Stephanie Kwan）
逆風走了10多公里，其實腿開始有點痛，眼見就快到終點，也忘記疲累，笑著跑餘下嘅公里。雨突然大了，好彩已到歡樂谷（類似海洋公園嘅地方），衝線了！天公不作美，但有你相伴，「你」是指沿路打氣嘅人，就算下著雨亦無減熱情，也令我重新感覺番跑馬拉松嘅樂趣。
（圖片來源：Stephanie Kwan）
（圖片來源：Stephanie Kwan）
跑步除了速度，你又會得到什麼？馬拉松不僅是一個比賽，是當地一個節日，也是我旅遊嘅目的。趁著去參加馬拉松，我又來到一個我唔會去玩嘅地方，反而有點驚喜。
食：一直感覺湖北野食辣野多，以為會水土不服。只要上網搵下，一樣可以「食好西」。早餐有豆漿、素菜包，晚餐可以去一些精緻嘅菜館，也有好多當地小吃，也有好多日本同韓國菜。係江漢路步行街有好多食肆，以當地消費不算平，但物超所值，同埋服務好又唔駛等位。
（圖片來源：Stephanie Kwan）
玩：我去旅行最鍾意hea，最鍾意cafe，所以去咗武漢著名文青區曇華林，超過十多間cafe同小店。由於時間關係，只能去其中兩間，一間係1920年建成嘅傳教士公寓內（融園），另一間design比較新派（大水的店）。
（圖片來源：Stephanie Kwan）
（圖片來源：Stephanie Kwan）
遊：武漢大學係著名賞櫻景點 ，當中有個地方叫「櫻園」，聽講花最盛開時要預約。可惜我地去嘅時候已經凋謝了，不過校園環境優美，值得去㗎，如果可以係裏面跑仲好。
（圖片來源：Stephanie Kwan）
跑：去旅行一定會帶鞋跑少少，遊覽下附近。由於時間關係，只能怱怱來回酒店至步行街，再享受個早餐，真係一個good morning！
（圖片來源：Stephanie Kwan）
好多朋友在facebook留言，話蝦嫂鏡頭下嘅大陸很不一樣，影到好似去左外國。坦白講，我對大陸會有好多不滿，也頂唔順佢地D文化，途中也鬧過吐痰嘅uncle (不過佢地可能聽唔明）；「New Barlen」、「周大生」依舊存在。但以旅遊、跑馬拉松來說，不一定差。就我「?野」所得，當地人打扮一D都唔娘，跑步裝備更不在話下，好多好型，感覺比下去。或者保持一個開放嘅態度、欣賞嘅心情，或者也會找到一些驚喜。
「擁有怎樣的心情，就會看到怎樣的風景」
（圖片來源：Stephanie Kwan）
延伸閱讀
・