肥妹名古屋馬拉松追夢之旅:夢想於漆黑裡仍然鏗鏘

發表於2017/03/14
3,648次點閱
0人收藏
加入收藏
當大家睇到呢篇文嘅時候,我已經抵達名古屋,準備兩日後參與名古屋女子馬拉松,嘗試挑戰人生第一場馬拉松。
 
今次呢一場,帶住誠惶誠恐嘅態度迎戰,因為絕對係一次越級挑戰。呢次挑戰,源自一次自己與自己打賭。
 
去年經歷過一切巨變,情緒直墮低谷。身處黑暗之中,幾乎有好幾晚都係瞓住喊醒。直至有一晚,突然諗起兩年前剛剛瘦身有成,參加人生第一場參加十公里賽嗰陣,跑到銅鑼灣避風塘聽到《無盡》……
 
「夢想,於漆黑裡仍然鏗鏘。」呢一句好似突然敲醒咗我。
 

(圖片來源:Katrinauntie)

肥妹,你仍然記得你嘅夢想嗎?曾幾何時,你遙望香港東區走廊,矢志要鼓勵至少十個人同場參與人生第一場十公里,嗰團火去咗邊?
 
係喎,團火去嗰邊?於是,呢點「無盡」星火燃亮嘅肥妹呢幾個月嘅練跑之路。大概,四年前200磅肥妹都無諗過四年後佢會走去抽馬拉松,仲要一抽就抽一個本地半馬、一個海外全馬,而結果竟然會係…
 

(圖片來源:Katrinauntie)

半馬落選,而海外全馬中了。
 

(圖片來源:Katrinauntie)

係遞交申請之前,我只係參加過兩年十公里賽,呢兩年長跑對我黎講,都不過係消脂同瘦身嘅工具。曾幾何時,我都FF過有一日會完成十年十公里,希望借助長跑嘅力量維持體重(唔係你以為減咗七十幾磅唔_駛Keep呀)。直到決定跑更遠,我先發現原來長跑係天使帶俾我一份禮物。
 
呢份禮物,係用汗水、時間換返黎,而最佳回禮,永遠都係感恩。


(圖片來源:Katrinauntie)

無論走上邊一段路,無論走上香港、台北、定係名古屋,每踏出一步都係值得我嘅向上天、向身邊所有報以微笑。
 
感謝你,馬拉松。我一直以為你就如電視機上嘅馬德鐘,遙不可及。直到遇上你,我先發現每一段走過嘅路都係為今日。由不良於行、到行得返、跑得郁,今日竟然踏上初馬追夢之旅。儘管訓練不足,訓練初期曾經受傷、甚至自我懷疑,不過呢一刻嘅我,已經無悔了。I AM READY TO RUN!
 
肥妹深信,初馬只係人生馬拉松嘅起點,無論今次結果如何,成功或DQ,呢一段路都無悔走過。成功了,日後尚有多少場大賽等待緊你。若然DQ了,再好好養戰,路一直都在。
 
只要相信夢定能飛。
 
P.S. 2017年3月12日,如果你想八卦我嘅成績,不妨3月12日比賽當日上大會官網搵搵 M31921號選手成績,網址http://p.marathon-festival.com

伸延閱讀