Garmin 100 - 全港最難的一百公里越野賽

FATSUN CHOI
發表於2017/02/23
4,505次點閱
1人收藏
加入收藏

(圖片來源: Daniel Chung

相信這幾天的Garmin報告大家看到有點膩,但有幸參加這個公認全港最難的一百公里越野賽,還是值得記下一筆。

今年的比賽以山賽為主,二月份有 The 9 Dragons Ultra 和 Garmin 100 兩個大賽,我已經放棄連續十年出戰的渣打馬拉松來備戰。兩星期前的The 9 Dragons Ultra 50/50 因事未能出戰後 50公里,接下來一週又被渣馬PB團洗版,有份睇無份玩的我早已心痒不已。由於賽期頻密無時間試路,加上 Garmin 100 部份路線和 The 9 Dragons Ultra 重疊,所以今次零試路的情況下出戰,賽前上 ITRA 睇資料攀升係 5450米,自己估算難度比The North Face 100 (下簡稱 TNF) 容易,與 Translantau 100 接近吧,但就因為計算錯誤付出代價。


(圖片來源:Eddie Kwan

估唔到咁熱

比賽當日陽光普照,氣溫高已經預計完成時間要加長,今年練習量和狀態不錯,22小時銀奬應該穩陣吧!頭兩段雖然熱但有樹蔭,跑起上嚟唔太辛苦,時間比預定快少少,到 CP2 蓬瀛仙館有隊友支援帶來食物;但天氣實在太熱飲咗大量飲品個胃都唔多舒服,食埋嘢就更加覺得頂住個胃。龍山一段烈日當空全程曝曬,尤其落山時開始有塞人現象,好辛苦捱到落 CP3 新屋仔,當時已經熱到無胃口食固體食物,勉強食了一包Gel和補水就繼續行,途經廁所即刻入去淋頭淋身降溫,感覺舒服啲。南涌上平頂坳開始有樹蔭同風,加上兩星期前比賽行過適應咗,消化咗食物個胃無再感覺頂住,行得好順,去到CP4新娘潭路見到蓮姐精神一振,食啲燒賣魚旦就繼續行。接近黃昏天氣轉涼開始跑得舒服,兩星期前 The 9 Dragons Ultra 烈陽上八仙嶺好痛苦但今次入夜完全唔辛苦,諗起有隊友在 CP6 鶴藪支援就好有力量咁走落去。去到 CP6 見到隊友送上熱湯熱麵感覺好幸福(呢個 CP大會無提供熱食),看一看時間還可以,22小時目標應無問題,士氣高昂,接下來一段九龍坑山更加發力過咗幾位跑手。


(圖片來源:Fat Sun

ITB ~ 痛!!!

接下來由太和一路上升到草山頂六百米以上攀升,中途 CP7 蓮澳得火車站義工團隊熱心支援送上食物和鼓勵,但在落草山的大斜問題出現了,右腳 ITB 覺得痛,心諗: 「唔係啩?仲有成廿公里,唔通要咁樣捱返去? 」因為距離關站時間尚遠,所以我係完全無切碎(中途退賽)的念頭,立即用左腳去就住落山,再慢慢捱到CP治理。到 CP8 針山先食止痛藥,再做伸展,感覺唔太嚴重便繼續上路。ITB 痛的特點係上山無乜事,落山好痛苦,所以我上針山係無問題,但落山就痛苦,要用雙 Poles先落再撐住慢慢落。由針山腳到金山呢短短幾公里係全程表現最差,一來腳痛快唔到,被其他人不斷超越;二來跑得慢就開始凍同眼瞓,所以越來越慢,好辛苦捱到去 CP9 金山。


(圖片來源:Moreland234)

金山/甘山?

CP9 金山有杯麵食,正好為飢寒交迫的我補充能量,之後再伸展 ITB,止痛藥開始發揮作用精神稍稍恢復,終於可以輕鬆Jog下。接下來的金山爆林段可算全程最精采的一段,在金山要不斷上落尋頂,再一個 Deep V 急降再急上接麥徑!想像一下ITB 痛之餘要落媲美黃龍坑的石級再爆上山,興奮程度可想而知。到龍門郊遊徑天色漸明,平時可以輕鬆跑的郊遊徑換成真郊遊速度慢慢走,由響石上施樂園一邊欣賞大帽山美景,最後慢慢跑回終點,完成了105公里的旅程。完賽成績,22小時32分,總名次26,雖然不是好成績,但進入休息室時跑友們掌聲鼓勵,因為大家深知比賽艱苦,惺惺相惜,能夠完賽已經係對得起自己付出的努力,大家一致認為這賽事超越 TNF 成為本地難度最高的100公里賽事。


(圖片來源:Rad)

比賽完成,要感謝大會義工,眾攝影師的無私付出,隊友們的支援鼓勵,還有家人的諒解。今年比較貪玩比賽操練頻密,下月的大嶼100是賽季煞科戰,之後將會休戰半年。當然操練還是會繼續的,但可能多點郊遊輕鬆跑,可以的話多帶小朋友郊遊,有機會的話大家一齊郊遊,週遊烈跑吧。


(圖片來源:Garmin 100 Offical Page)

延伸閱讀
發言
還沒有人發言耶!快來當一樓!