記得12月完成了半丶全丶半三連環後，心已經散了，只想 fun run，練習也有「優惠」。朋友丶教練也說過埋渣馬先重新起步，心入面真的不好受。

一直對渣馬沒有期待，因為聽說很悶，加上上年水戰半馬慘痛經歷，我已經成日想呢42公里點捱。但另一方面，第一次在主場跑全馬，又會見到好多跑友，俾人見到我跑得唔好咪好核突？我就係咁， 成日俾自己壓力，怕人笑唔會跑，怕人笑呃like，也怕完不到。蝦叔呢個月聽得最多應該係「我唔想去渣馬」「不如改去打氣」...... 

（圖片來源：Step）

比賽前沒有寫太多，好似「出口術」，上個月有幾次練習加速後，前脛骨有少少痛，身邊有很多女性朋友也有 shin splints。其實我好擔心，晚晚也敷冰，貼下藥貼，衝圈也就住，游多D水。特別是減量後，D痛好似走哂出嚟，係咪以後冇得跑呢？到比賽日前兩天收到指示，跑到田中4:51成績就足夠了。心大心細，廣州平路也只是4:46，今次咁多斜路，一定死，冇乜信心，5個小時內我自己收貨。

（圖片來源：Step）

比賽日，天公作美，在漆黑中開始，一開始已經同自己「對話」，要專心丶看心跳丶看地下丶小心周邊跑手......呢段不算迫，大家也很禮貌，只係地下好多水樽丶雨衣，只能提醒跑手小心。跑過奧海城丶經過美孚......沒有特別看pacing，反而留意心跳，走到7K意外地平均時間係6分頭，擔心之後捱不下去（平時走10K只能60分鐘），但又覺得冇理由唔試下，最後決定走多1K得1K。在途上見跑友，同我影相，大家加油，其他時間則盡量專心。

（圖片來源：Step）

跑下跑下，見到斜路提自己「拉高身體」、「一呼一吸」，不知不覺已經21K，半馬pb了三分鐘，pacing約6:15。路盲嘅我只知道過左第四個折返點，好似回程了，至於三隧三橋，好似剩返西隧咋！開始有少少興奮，同時亦出太陽，體力下降。

去到差不多27K，開始混入半馬跑手，多咗人更加要留意，之前一直跑也看到有人跌倒，所以盡量走少人位置，有相機也skip了。去到西隧口已經好疲累，但心想自己keep到呢個pacing 近3/4, 之後點跑都pb，但做唔做4:30內？

（圖片來源：Step）

隨後就見到好大個廣告「堅持」，搏一次，之後未必有機會，在最難熬的西隧也拼命追，上斜也沒有停，出到西隧口突然心跳好快，所以慢走一陣。剩下5k，又計算著，keep住6分半也可以4:30。去到龍和道見到好多朋友打氣，好多相機，只能怱怱走過。去到會展只剩下2K，橫隔膜突然抽筋，自己按摩一下頂埋佢。去到銅鑼灣好熱鬧，見到熟悉的面孔.......入維園，見到個鐘4:28，涙水又再湧出來，超額完成了第六馬。

（圖片來源：Step）

好多朋友好奇怪點解我會咁著緊嗰幾分鐘，也有說我平時都冇攞獎，平時衝400也只能1分尾2分，10k半馬也是初級者，咁擔心為乜。我沒有天份，唔會一跑就快，只能說性格，慢腳也可對自己有要求，想自己進步，追時間也可能是跑馬的另類樂趣。

（圖片來源：Step）

延伸閱讀