我打贏自己 - 環大帽山越野賽後記(下)

May Lee
發表於2017/01/19
3,412次點閱
0人收藏
加入收藏

(圖片來源:May Lee)

响黃泥墩村村公所前,玩完 Whatsapp 收起電話,突然有兩個人衝過來,原來係跑班同學 Tigger 同埋 Sam 呀! 係啦,哩班係 元打火 YTF (50公里) 嘅跑手。同佢地影完相好似得到加持咁 - 成個人醒哂!!可以慢慢跑,去到大棠檢查站真係覺得肚餓了,試下食碗麵,再無想嘔嘅感覺:「畀多碗我吖唔該....。」

見到 YTF 跑手已魚貫出發,諗住等多陣就繼續跟尾走,點知呢個時候有個人淚流滿面走埋來,原來係小鮮橙,佢話响呢道見到我好感動,因為佢從 support team 道得知我出咗啲狀況,擔心我頂唔到去大棠。「放心啦,之前嘅112公里已過去,之後50公里我又再從新起步!!」

開始向四排石山進發,又熱又曬,開頭仍然係有少少眼瞓,再走呀走,精神就返哂嚟!只係傳說中嘅 ITB 時有時冇,落山時都唔敢全力衝,一直落到凹頭,又做咗另一件白痴嘅事,明明舊年都走過,就係唔記得咗去逢吉鄉檢查站要過隧道。一直走,重遇見一位唔識路嘅 YTF 國内跑手,就係咁一齊走,走到好遠後覺得唔多妥,點解無遇到其他參賽者?而雞公嶺重响老遠嘅對面?

立即返轉頭搵番個隧道口,一來一回已多走兩公里,走番啱嘅路,走到路口未轉彎時,已經見到十一嫂出咗來等我。佢見到小鮮橙都到咗檢查站但我仍未見人,有啲擔心(抱歉又令你哋擔心喇!)

入咗檢查站坐响地下大吃大喝,除咗補償番前一晚食唔到嘢,更為咗食飽後有力上山,又可以鬆鬆腳,為最後幾段路好好加油!!

雞公嶺段與腳痛嘅小鮮橙結伴同走,突然收起嘅太陽令我哋走哩段更加順暢,下山段仍以急步為主,大約兩小時多到打石湖 SCP,轉頭一望發現小鮮橙居然未有跟貼,嗰一刻,我決定要等埋佢,至少要走埋大刀屻哩段,因為落到嘉道理檢查站,已經等如手執三分一證書,而且我哋嘅 support team 都响道等梗我哋。叫佢有力就快上,必須於日落前上到北大刀屻,佢手握雙棍忽然爆上去,我就繼續以穩定步伐上上上,天色仍然好藍,走至連接北大刀刃嘅一個位置時,我忽然聽到連串聲音,我再走上幾步轉右,就見到地下有一個背包及一對行山杖,快速向右瞄一瞄,依稀睄到有位師兄在辦大事。

此時此刻當然不便打擾,就當睇唔到睇唔到咁繼續前行。再走多幾步時又聽到前面有呼喚聲,一望就見到有位師兄企响道搵人。師兄問道:「請問有無見到一個參賽者著住哩件衫?(佢拉一拉自己件衫) 我行行下唔見咗佢。」我如實回答:「係咪著哩件衫我就唔知,不過我頭先好似睄到有位師兄正在辦大事,可能係你朋友喎!」師兄聞言即呆一呆,「你朋友又係嘅,行開辦大事要同你講聲丫嘛,我估佢應該好快啩,你响度等等佢啦。」

別過師兄,我繼續上,一直走至大刀屻,此時腳仔非常生性,我加快腳步 jog 落去,一直跑到去,見到我哋嘅 support team 喇!從來都係貧民式參賽嘅我,今次居然有皇帝式招呼!勁食之餘重有櫈坐有專人按摩,「好爽皮呀!」

幸福嘅時光過得特別快,已停留咗唔短時間喇!我食飽後與小鮮橙約定終點見後,就馬上再出發,行向萬德苑時見到有位荃打火(115公里)參賽者逆行而至,原來佢決定棄賽!其實只餘22公里左右,無傷痛下棄賽實在太可惜了。

極順利上到四方山,一直走向燕岩入口!燕岩係全條賽道中我最喜歡嘅一段,除咗被參賽者截停兩次問路外,全段非常流暢,約一小時多就到咗碗窰!

只餘大約十公里,心情好輕鬆,响檢查站邊飲湯邊同攝影師強哥及義工們吹水,吹到爭啲唔記得要追時間,飲完湯馬上走人,望望時間兩小時內應可返到終點,「加油上上上,鉛礦坳,到!草山,到!」

上到草山就覺得好似上到天堂一樣,終點好快就到喇!跑啦跑啦,跑唔夠幾步,「ITB 你唔係而家至嚟搞事嘛?做乜又返嚟呀?」下坡喪跑變下坡慢彈跑,彈吓彈下,終見到沙田巿鎮塊牌,真正最後一段了,平、上、落都不能快跑,唯有自言自語地叫腳仔乖啲,而家放鬆吓,等陣一定要跑返終點呀!終於落哂所有石屎樓梯,到咗黃竹洋,腳睇嚟又冇乜事,打算急走鬆鬆腳後就跑,十一伉儷正响終點等緊我!

走走吓見到遠處有個藍色風褸男子逆走而上,再走近啲咁熟面口嘅....係二師兄呀!佢哋來咗終點等我!二師兄帶住我跑落黃竹洋大斜路,感謝腳仔非常合作,完全無問題重幾有力下(好變態!)。跑到落去後,又見到另一個熟面口嘅,原來係 EC 呀!重有 Jenny 同 CC 都來咗等我,好滾動呀!!!

比佢兩個左右夾住,跑呀跑一直奔向終點,臨尾重有百幾米時,二師兄重彈咗句「最後一百睇你喇!」加速奔向終點,一轉左,終點已在眼前,有位師兄正慢慢行去,唔好意思呀,雖然冇禮貌,但咁多人等我,我唔可以停低等你慢慢過,跟住就繞過師兄,跑過終點了!哈哈 !終於完賽了!!

CC居然帶埋蕃薯糖水畀我!好正呀!故事重未完,約定終點見嘅小鮮橙仍未見蹤影,大家都好擔心,時間一分一秒咁過去,我哋企哂出去終點外睇到實,忽然主辦人 Paul Sir 走出來,望幾望:「應該無人㗎喇,收嘢喇。」「唔係呀!我哋重有朋友趕緊落嚟,等埋呀 ⋯⋯!!」。剩下幾分鐘,終於見到熟悉嘅身影「快啲啦,得番幾分鐘咋!」好彩係工業區,深夜大呼叫唔會被人鬧,小鮮橙盡最後努力,趕及限時前返到終點了!三個U人都順利完賽了!!

多謝超強嘅 support team、一直為我打氣及响終點等我的朋友:勞苦功高嘅十一伉儷、賢仔、Michelle 、Yvonne、Jescho、Wendy、Color、完賽後留响終點等嘅通師兄、Tigger、專程來等我過終點嘅二師兄、Jenny、EC、CC及其他人等,多謝哂!!

重要多謝我對腳仔,雖然中途多次恐嚇我,但最後都乖乖哋跑番終點,乜事都無,真係我最好嘅拍檔~!

重要多謝我嘅膝頭,撞咗咁多次山邊,瘀哂又流血依然咁硬淨,辛苦哂!!

延伸閱讀

發言
Jackson Yam
回應於 2017/01/26 12:58:20
1樓
恭喜完賽 (y)