寸爆跑膠

高達奔
發表於2015/01/20
913次點閱
0人收藏
加入收藏

最近《主場新聞》的渣馬評論相當豐富,多謝園丁、TC、流行萬里、馬拉Joe和Edkin等等作者,差唔多每日都有新文章,用不同的角度分析渣馬,但最精采、最富娛樂的,都係每篇文章後的討論。個別人士責難不滿冇蕉食的跑手:世界好多馬拉松得水飲喳,連蕉都冇呀!你地只懂埋怨,不如撫心自問自己體能點解咁渣!有無用心操練呀 ?


這些口吻,喺咪好熟口面呢?呢啲咪就黎王敏超的口吻,斥責呂品韜輸波賴地硬,黃金寶去勻全世界都冇隊醫啦,你就淨喺識諉過於人囉!


當民建聯都要做理性的建制派,是其是、非其非,絕不逢梁必撐,落得有辱無榮的境地,但渣馬忠實死硬擁躉,似乎仍死抱華國鋒對老毛的兩個凡事:凡是渣馬的決定和安排,我們都堅決擁護;凡是渣馬定立的規矩,我們都始終不渝地遵循。就算渣馬做得唔好,參加者都應該先檢討下自己係咪有問題,因為香港人一定要支持渣馬,參加者只可以善意建言,唔可以嚴詞狠批,咁樣等於狂抽渣馬水兼「唱衰自己的比賽」!


睇到王敏剛上身啲留言,都咪話唔谷氣,所以今次終於要由花生友,變做鍵盤戰士,加入插渣馬的戰圈,希望點醒果啲唔懂獨立思考,盲挺田總和渣馬的跑膠。有乜讀者就有乜傳媒,有乜市民就有乜政府,有乜跑手就有乜比賽,想香港的馬拉松進步,一定要教育跑手唔好變跑膠。


想知道自己喺唔係跑膠,麻煩各位跑友,花少少時間做一個心理測驗:



問題一:你覺得渣馬提供唔夠蕉,又或者得生蕉,係咪好有問題?


A. 小題大做!跑步唔係為左食蕉。唔夠實力、唔夠操練的跑手,先會對一剝蕉都咁大反應。


B. 只係大會行政和溝通有問題啫,唔駛去到咁極端,上綱上線呀?


C. 無辦法,大會係咁,下年只好自己帶。


D. 已經17年了!但連蕉的細節都做唔好,反映大會根本無能力辦大型活動,是時候撤換。


 


問題二:對於渣馬把大量補給當剩食捐出去,你有何感覺?


A. 嗱,證明大會物資足夠啦,你地仲插佢慳錢唔買蕉,係對大會唔公道!渣馬做緊好事,你地應向渣馬道歉。


B. 可能太多人甩底,大會又驚畀人鬧唔夠預多咗啫,送出去都係好事。


C. 大會的行政和運送有問題,希望下年汲取經驗啦,送出去唔好嘥都係好事


D. 說好的香蕉一條都冇,原來係囤積埋捐出去!搞左17年都終係咁!根本就喺誤導,等外界以為跑手食得好豐富,跑步好浪費食物,係陷跑手於不義!


 


問題三:你喺咪好支持渣馬?


A. 香港人,梗係要支持自己的比賽啦,唔可以唱衰同批評!


B. 都知道渣馬揸流灘,但未至於一無是處,都係香港一個盛事。


C. 渣馬是是旦旦,越做越衰,但無辦法,香港得一個比賽,冇得唔參加。


D. 田總渣打長期騎劫香港馬拉松,阻礙香港馬拉松的進歩,不會再參與。


 


問題四:對於田總的帳目不清,高威林被傳媒指利益衝突,你的看法是:


A. 樹大招風,其他人眼紅渣馬成功,指控不值一晒,如果唔喺老廉一早拉人啦!你年年講煩唔煩啲呀?


B. 田總和高生雖然麻麻地,但始終都係大型活動,都係為香港做好事。


C. 麻木,香港體育界就係咁,唔鍾意只好唔跑囉。


D. 憤怒,污辱了這項崇高的運動。


 


問題五:你對渣馬賽道的意見是:


A. 全世界最好的賽道,波士頓都無得比,夠挑戰,風景好,西隧令人心曠神怡!


B. 三隧三橋都係香港特色嘅,真正熱愛跑步的,喺唔應該彈賽道,彈咪唔好跑囉!


C. 有些悶,空氣麻麻地,但跑咁多年都有感情了,希望年年都去跑


 D. 傷肺、傷身更傷心;冷冰、零互動、感受唔到香港風情。好似台灣人講,應該正名做國道馬拉松(國道即高速公路)。


 


問題六:有人話鍾意渣馬禁止打氣,搞到無晒氣氛,你的意見是:


A. 波士頓條賽道的打氣聲真係好x嘈,唔該佢哋收聲啦,柏林多野飲到你狂疴,渣馬最好啦,無人騷擾你做PB。


 B. 比賽唔一定要打氣,真正熱愛跑步的,係唔會介意呢啲嘢。


C. 都係架,但香港係咁,就算你畀人打氣,查實香港人都未必來啦!


D. 點解唔畀打氣呢?點解,點解???


 


問題七:跑馬拉松時,你會唔會食,市民沿途自發提供食物?


A. 唔會,真正有實力的係唔需要,何況賽規唔畀食,而且我仲好驚中毒,唔知乜人畀乜嘢你食。


B. 唔會,驚畀田總DQ。


C. 唔會,驚PB唔到,慳返些少時間


D. 會,並多謝市民的熱心支持,令賽事氣氛更好,令其他市民都可以參與。


 


問題八:你對渣馬輪椅賽的安排有何看法?


A. 阻住地球轉,為幾個人封成條路唔值,搞多場10K好過。班人仲投訴就取消佢啦,唔搞就唔駛煩


B. 大會規矩係咁,都認同輪椅有安全問題。投訴咁多做乜?練好些,下年咪唔會畀DQ囉。


C. 大會唔係無心搞嘅,只係無乜經驗啫,可以向大會反映意見,下年進步啦。


D. 好唔合理,大家都係平等的,點解一定要設時限淸佢地走,唔可以一齊跑?


 


問題九:你認為大會於20.3 km設split time計時,有冇問題?


A. 我計過的確係半程,唔明點解你話係20.3。


B. OK啦,擺多個計時位都要錢,三百蚊就唔好咁多要求啦,再嘈連跑都冇得跑!


C. 係咩?原來係20.3 km?


D. 搞咁多年都係咁,連本身的專業都做唔好,田總真係搞乜鬼比賽。


 


問題十:你覺得渣馬應該幾點起步?


A. 越早越好,跑完左仲可以食早餐返去訓覺,唔駛咁熱。


B. 而家幾好,唔會太熱。


C. 太早啦,但一年一次,算啦。


D. 如果係照顧跑手,等大家最好狀態,點解唔改去較乾、較涼的十二月尾至二月初,到八、九點大家食個好早餐再起步?


 


問題十一:你認為邊個應該為起步鳴槍?


A. 呢個問題小題大做,你要搵葉伯,有無先問過佢老人家肯唔肯呀?你都戇居。


B. 葉伯應該在老人院好好休息,你抽夠葉伯水未呀?唔好為左反渣馬而搞佢,好唔好?


C. 搵市長特首鳴槍,其實好正常呀。


D. 應該搵跑手尊重,有公信力的人鳴槍,希望可以趁葉伯在生向佢致敬,或者係大家認同的李麗珊,黃金寶。


 


計分方法:


A:一分              B:兩分              C:三分              D:四分


11-16分


你係全宇宙最無敵的渣馬粉絲,也是無可救藥的跑膠,下年渣馬應該搵埋你去鳴槍。


17-33分


你係簡單的跑手,但亦都因為太簡單,所以對渣馬田總過分包容,有斯德哥爾摩症候群的病癥,間接助長田總是是旦旦,年年求其hea過。你雖然好認真跑步,但對你黎講,馬拉松只係一個比賽,畀大家做時間而已,所以對比賽安排要求唔多,除左時間成績外,唔會對馬拉松有乜夢想。


33-40分


你係對比賽有少少要求的跑手,希望比賽做好啲,但亦覺得應該畀田總機會改進,樂於反映意見,唔會輕易罷跑渣馬,雖然渣馬唔愛你,但你仲未死心。


40-44分


你對田總渣打早已不存寄望,明白這不過是一場沒有結果的苦戀,歡迎加入愛馬力行列,爭取早日撤換阻住香港馬拉松進步的田總!


發言
還沒有人發言耶!快來當一樓!